bituff bjóðar til Vinnurák um Broytingarleiðslu hósdagin 7. novembur kl. 13-16 í Norðurlandahúsinum. Hesaferð er tað Hans Petur í Brekkunum, stjóri í Føroya Symfoniorkestrið, ið fer at leiða Vinnurákið.
Hví skal nakað broytast? Hvar byrjar ein broyting og hvussu fært tú starvsfólk at taka undir við broytingini?
Á Vinnurákinum fer Hans Petur at greiða frá, hvussu hann hevur arbeitt við leiðslu og broytingum uttan leiðsluútbúgving, og hvussu hann síðan hevur brúkt sína leiðsluútbúgving. Hann fer m.a. at koma við dømum um hvat hevur riggað væl og hvat hevur riggað minni væl og hví.
Sum ungur arbeiddi Hans Petur sum professionellur tónleikari og undirvísari, men seinastu 18 árini hevur hann arbeitt sum stjóri í ávikavist Føroyahúsinum í Keypmannahavn og síðan í Føroya Symfoniorkestri.
Hevur tú hug at læra meira um hetta evnið, so ert tú vælkomin til Vinnurák hósdagin 7. novembur 2024 kl. 13 – 16.
Dagur: Hósdagin 7. novembur 2024
Tíð: 13.00 – 16.00
Stað: Norðurstova í Norðurlandahúsinum
Málbólkur: Tú arbeiðir sum leiðari, ráðgevi, HR-leiðari ella bara hevur áhuga fyri evninum
Kostnaður: 1.500 kr.
Hans Petur í Brekkunum hevur lokið prógv í saxofonspæli frá Det Jydske Musikkonservatorium í Aarhus og hevur seinni tikið ein E-MBA frá Middlesex University í London.
